BY 
23 верасня на філалагічным факультэце БДУ прайшла міні-выстава "З глыбіні стагоддзяў: стараабрадніцкія кнігі кірылічнага друку". Старшы выкладчык кафедры тэарэтычнага і славянскага мовазнаўства Рааго Павел Аляксандравіч прадставіў студэнтам-першакурснікам спецыяльнасцей «Беларуская філалогія» і «Славянская філалогія» частку ўласнай калекцыі друкаваных і рукапісных стараабрадніцкіх кніг, пазнаёміў з асаблівасцямі іх вытворчасці і афармлення, са складанасцямі, што ўзнікаюць падчас іх атрыбуцыі. Выставе папярэднічаў кароткі аповед пра спецыфіку стараабрадніцкай кніжнай культуры і стараабрадніцтва ў цэлым. Студэнты змаглі на свае вочы ўбачыць, а таксама пагартаць і пачытаць некалькі рэдкіх выданняў, кожнае з якіх па-свойму цікавае. Так, "Псалтыр" 1733 года, надрукаваны ў друкарні праваслаўнага брацтва Богаяўлення ў Магілёве, з'яўляецца адной з першых кніг, выдадзеных стараверамі. «Часоўнік» 1793 года вылучаецца дароўным надпісам, які сведчыць, што раней ён належаў саратаўскаму купцу Фёдару Якаўлевічу Дружыніну (у цэнтры Саратава дагэтуль можна ўбачыць узведзены ў 1898 годзе «дом Дружыніна»). Друкаваны «Залатавуст» 1812 года змяшчае каляровую рукапісную выяву Іаана Залатавуста, выкананую па ўсіх іканаграфічных канонах. "Азбука пачатковага вучэння" 1918 года знаёміць, з якіх кніг пачынаўся працэс навучання дзяцей-стараабрадцаў. Асаблівую ўвагу сваім афармленнем і зместам прыцягнулі рукапісныя тэксты, створаныя ў другой палове XIX стагоддзя. На выставе таксама можна было пазнаёміцца з тэматычна блізкім уніяцкім «Малітвасловам», выдадзеным у Пачаеўскай лаўры ў 1741 годзе (уніяцкія выданні ў цэлым з'яўляюцца вельмі рэдкімі на сённяшні дзень). Першакурснікі праявілі жывую цікавасць да экспазіцыі, мелі магчымасць задаць усе пытанні, якія іх цікавілі, і ў прамым сэнсе гэтага слова дакрануцца да гісторыі.
