BY 
17 лютага 2026 г. студэнты філалагічнага факультэта БДУ разам з загадчыкам кафедры тэарэтычнага і беларускага літаратуразнаўства дацэнтам Таццянай Марозавай наведалі прэзентацыю кнігі члена Саюза пісьменнікаў Беларусі Генрыха Тарасевіча “Мой светлы шлях”. Прэзентацыя прайшла на пляцоўцы кніжнага магазіна Дома кнігі “Светач”.
Генрых Тарасевіч – кандыдат сельскагаспадарчых навук. удзельнік ліквідацыі наступстваў катастрофы на Чарнобыльскай АЭС. Працаваў у Інстытуце глебазнаўства і аграхіміі, Акадэміі аграрных навук, Міністэрстве сельскай гапсадаркі і харчавання, Дэпартаменце па ядзернай і радыяцыйнай бяспецы Міністэрства па надзвычайных сітуацыях, Палаце прадстаўнікоў Нацыянальнага сходу Рэспублікі Беларусь. Аўтар паэтычных кніг “Прадчуванне вясны”, “Адлюстраване душы”, “Носьбіт”, “Рэфлексія шчырасці” і інш.
Прадставіў Генрыха Тарасевіча дырэктар РУП “Выдавецтва “Беларусь” Аляксандр Карлюкевіч, які ўзгадаў шлях паэта ў літаратуру, яго першыя вершы і абставіны выдання зборніка “Мой светлы шлях”.
Пасля слова ўзяў сам аўтар кнігі, які коратка агучыў сваю біяграфію, падзяліўся цікавымі момантамі пра напісанне вершаў, выказаў падзяку людзям, якія былі побач, падтрымлівалі і натхнялі. Пасля Генрых Тарасевіч з падкупальнай шчырасцю чытаў свае вершы.
Нечаканым і прыемным падарункам для ўсіх прысутных сталі песні, якія Генрых Тарасевіч напісаў на ўласныя вершы і сам выканаў.
Напрыканцы прэзентацыі аўтар падпісаў зборнікі жадаючым аматарам сучаснай паэзіі і сфатаграфаваўся са студэнтамі.
Жадаем Генрыху Тарасевічу далейшых поспехаў на ніве беларускай паэзіі!
