Круглы стол «Філолаг – прафесія ганаровая»

14 лістапада кафедра беларускага мовазнаўства правяла пасяджэнне круглага стала «Філолаг – прафесія ганаровая». Мэта мерапрыемства – абмеркаванне значэння і ролі філолагаў у сучасным грамадстве, у вывучэнні моў і літаратур, асэнсаванне значэння філалагічных даследаванняў для захавання культурнай спадчыны, сучасных аспектаў навуковай, педагагічнай, рэдакцыйна-выдавецкай дзейнасці філолагаў.

Ва ўступным слове загадчык кафедры беларускага мовазнаўства Г.К.Чахоўскі адзначыў, што метазадача мерапрыемства, якое аб’яднала ў сценах філалагічнага факультэта педагогаў-практыкаў, навукоўцаў, спецыялістаў у галіне рэдакцыйна-выдавецкай дзейнасці, заключаецца ў тым, каб вызначыць, якія змены зведала філалогія за апошнія гады, якія задачы і выклікі стаяць сёння перад гэтай навукай, якія метадалагічныя інавацыі былі рэалізаваны, якая будучыня чакае яе.

Галоўны рэдактар навуковага і метадычнага часопіса “Роднае слова” Наталля Мікалаеўна Шапран распавяла пра ўнікальнасць выдання, асаблівасцях працы рэдактара з аўтарам і тэкстам, акцэнтуючы ўвагу на выключнай важнасці роднага слова для кожнага філолага.

У выступленні старшыні вучэбна-метадычнага аб’яднання настаўнікаў беларускай мовы і літаратуры ліцэя імя Ф.Э.Дзяржынскага БДУ  Вольгі Сяргееўны Ратарэнка закраналіся  надзённыя для будучага маладога спецыяліста пытанні пошукаў свайго шляху ў прафесіі настаўніка.

Малодшы навуковы супрацоўнік аддзела лексікалогіі і лексікаграфіі філіяла «Інстытут мовазнаўства імя Якуба Коласа» ДНУ «Цэнтр даследаванняў беларускай культуры, мовы і літаратуры НАН Беларусі» Паліна Сяргееўна Басалыга пазнаёміла студэнтаў са спецыфікай укладання лексікаграфічных крыніц, асаблівасцямі рэалізацыі нормы, узуса і варыянтнасці.

Падчас мерапрыемства студэнты і выкладчыкі адказалі на пытанні аб тым, чаму яны выбралі прафесію філолага, звярнулі ўвагу на найбольш значныя сучасныя тэндэнцыі ў філалагічных даследаваннях, эфектыўныя метады і прыёмы навучання мове і літаратуры, важныя прафесійныя навыкі, а таксама цяжкасці, з якімі яны сутыкнуліся ў працэсе навучання і прафесійнай дзейнасці.