BY 
З 29 чэрвеня па 11 ліпеня 2026 года на базе вучэбна-навуковай лабараторыі беларускага фальклору кафедры тэарэтычнага і беларускага літаратуразнаўства філалагічнага факультэта БДУ фальклорную практыку праходзіла група студэнтаў спецыяльнасці «Руская філалогія» пад кіраўніцтвам загадчыцы ВНЛБФ Веры Дзянісенка.
У межах індывідуальнага задання практыканты займаліся рэтраканверсіяй фальклорных тэкстаў з рэгіянальнага архіва Фонду лабараторыі. Праца заключалася ў вывучэнні фальклорных твораў, расшыфроўцы рукапісных матэрыялаў і пераводзе змешчанай у іх інфармацыі ў электронны фармат. Кожная жанравая картка ўключала тэкст фальклорнай адзінкі, звесткі пра збіральніка і інфарманта, час і месца запісу, а таксама розныя каментарыі. Апошнім этапам былі праверка і верыфікацыя ўнесеных дадзеных, каб звесці да мінімуму магчымыя памылкі.
Асаблівую ўвагу студэнты надалі вызначэнню жанравай прыналежнасці твораў у тых выпадках, калі адпаведныя паметкі збіральніка адсутнічалі. Для гэтага практыканты аналізавалі кампазіцыйныя і стылістычныя асаблівасці тэкстаў, а таксама характэрныя сюжэтныя матывы. Такая праца дазволіла ім прымяніць тэарэтычныя веды па фалькларыстыцы, набыць навыкі тэксталагічнага аналізу і паглыбіць разуменне жанрава-відавой сістэмы беларускага фальклору.
Навукова-практычную цікавасць выклікала і праца з дыялектнымі асаблівасцямі мясцовага фальклорнага матэрыялу. Яго даследаванне патрабавала ад студэнтаў не толькі лінгвістычнай падрыхтоўкі, але і ўмення разглядаць моўныя з’явы ў кантэксце гістарычнага развіцця канкрэтнага рэгіёна.
Вынікі фальклорнай практыкі на базе вучэбна-навуковай лабараторыі беларускага фальклору БДУ былі падведзены 11 верасня 2026 года. Студэнты адзначылі, што выкананая праца стала не проста часткай вучэбнага задання, але і ўкладам у захаванне і вывучэнне нацыянальнай культурнай спадчыны. Практыка дапамагла будучым філолагам лепш зразумець адметнасць беларускага фальклору, адчуць сувязь з традыцыямі і гісторыяй народа, а таксама падрыхтавацца да далейшай прафесійнай дзейнасці ў сферы філалогіі і культуралогіі. Набыты вопыт спрыяў фарміраванню адказнага стаўлення да пытанняў захавання культурнай спадчыны для будучых пакаленняў.
