Сэрвісы

Сустрэча з прафесарам Любоўю Ляўшун – аўтарам кнігі пра Ефрасінню Полацкую

Сустрэча з прафесарам Любоўю Ляўшун –  аўтарам кнігі пра Ефрасінню Полацкую

18 лістапада 2026 года кафедра тэарэтычнага і беларускага літаратуразнаўства філалагічнага факультэта БДУ арганізавала сустрэчу з вядомым літаратуразнаўцам, доктарам філалагічных навук, прафесарам Любоўю Ляўшун. Мерапрыемства было прысвечана Году беларускай жанчыны. У ім ўзялі ўдзел загадчык кафедры дацэнт Таццяна Марозава, дацэнты кафедры Вольга Прыемка і Ларыса Гедзімін, студэнты 3 курса спецыяльнасцей “руская філалогія”, “славянская філалогія” (польская), 4 курса спецыяльнасці “рамана-германская філалогія” (французкая, італьянская).

Любоў Ляўшун – даследчыца ўсходнеславянскай медыявістыкі, аўтар шэрагу навуковых прац, прысвечаных гісторыі старажытнай беларускай кніжнасці і культуры. Яе кніга «Ефрасіння Полацкая: імя ў гісторыі» (2022) прапануе навуковую інтэрпрэтацыю жыцця і дзейнасці беларускай асветніцы, імкнучыся адказаць на пытанні, якія застаюцца па-за межамі традыцыйнага жыційнага апавядання.

Падчас сустрэчы Любоў Ляўшун прадставіла сваё бачанне асобы Ефрасінні Полацкай, заснаванае на аналізе гістарычных крыніц і жыційных тэкстаў. Яна звярнула ўвагу на неадназначныя і маладаследаваныя аспекты біяграфіі асветніцы: абставіны яе нараджэння, сэнс цуду пры пострыгу, характар дзейнасці ў Сафійскім саборы і ў Сяльцы, а таксама храналогію паломніцтва ў Іерусалім. Такі падыход дазволіў па-новаму зірнуць на знакамітую постаць.

Асобнае месца ў размове заняў расповед Любові Ляўшун пра сябе. Яна падзялілася гісторыяй уласнага шляху ў навуцы – ад вывучэння тэорыі літаратуры і старажытнай кніжнасці да паглыблення ў медыявістыку, што дазволіла ёй падысці да постаці Ефрасінні Полацкай не толькі як да рэлігійнага сімвала, але і як да гістарычнай асобы з уласнымі інтэнцыямі і складаным лёсам.

Сустрэча падкрэсліла важнасць жаночага голасу ў навуцы і культуры. Зварот да постаці Ефрасінні Полацкай – першай вядомай беларускай асветніцы і апякункі зямлі беларускай  – у Год беларускай жанчыны набывае асаблівае гучанне: гэта нагода пагаварыць пра тое, як жанчына ў XII стагоддзі здолела стаць цэнтрам духоўнага і культурнага жыцця, і пра тое, як сучасныя даследчыцы працягваюць адкрываць і пераасэнсоўваць гэтыя сюжэты.

Кафедра тэарэтычнага і беларускага літаратуразнаўства выказвае падзяку прафесару Любові Ляўшун за змястоўнае выступленне і спадзяецца на працяг супрацоўніцтва.

ph2011202619287391273.jpg

ph20112026182738120389.jpg

Image

Рэсурсы

Image
Image
Наш сайт использует файлы cookie

Наш сайт использует файлы cookie для сбора статистики. Нажав «Принять», вы даете согласие на обработку файлов cookie в соответствии с Политикой обработки файлов cookie.