Тыдзень беларускай мовы

 Праграма

правядзення Міжнароднага дня роднай мовы

і Тыдня беларускай мовы

на філалагічным факультэце

Беларускага дзяржаўнага ўніверсітэта

Дзень 1. 21.02.2013 (чацвер, 12⁴⁵ – 14¹⁵)

Міжнародны дзень роднай мовы

Адкрыццё Тыдня беларускай мовы з удзелам рэктара Беларускага дзяржаўнага ўніверсітэта, акадэміка С.У. Абламейкі.

Да ўдзелу запрошаны старшыня Міжнароднага камітэта славістаў, прафесар, член-карэспандэнт Нацыянальнай акадэміі навук Беларусі А.А. Лукашанец, паэт-песеннік Л. Дранько-Майсюк, ансамбль цымбалістаў УА “Гімназія-каледж пры Беларускай дзяржаўнай акадэміі музыкі”.

Прапануецца літаратурна-музычная кампазіцыя“І наша мова – з-пад крыла душы…”,у якой адлюстраваны гістарычныя і лёсавызначальныя этапы развіцця беларускай мовы, роля беларускіх пісьменнікаў і навукоўцаў у яе станаўленні (беларуская мова ў асобах і датах). Будуць прачытаны вершы вядомых беларускіх пісьменнікаў, уласныя вершы студэнтаў, прысвечаныя роднай мове, праінсцэніраваны ўрыўкі з твораў мастацкай літаратуры, выкананы песні на вершы вядомых беларускіх паэтаў.

У мерапрыемстве ўдзельнічаюць студэнты філалагічнага і іншых факультэтаў.

Дзень 2. 22.02.2013 (пятніца, 12⁴⁵– 14¹⁵)  У гасцях на філфаку

Гісторыя Беларусі вачыма мастака

Да ўдзелу запрошаны Я. Мяльніцкі, гід-экскурсавод, мастак-аматар, які прэзентуе аўтарскія мастацкія карты з выявамі этнічнай Беларусі ў складзе Вялікага Княства Літоўскага, Рэчы Паспалітай і Еўропы ў XIV—XVIII стст., а таксама прадставіць уласныя графічныя ілюстрацыі да аповесці Яна Баршчэўскага “Шляхціц Завальня, або Беларусь у фантастычных апавяданнях”.

Дзень 3. 25.02.2013 (панядзелак, 12⁴⁵ – 14¹⁵)

Філалогія і Я

Інтэлектуальна-пазнавальная гульняз удзелам студэнтаў 1 курсаў спецыяльнасцей “Беларуская філалогія” і “Славянская філалогія”. Іх чакаюць рэкламны, вітальны, паэтычны, граматычны, крэатыўны, песенны і іншыя конкурсы.

Дзень 4. 26.02.2013 (аўторак, 12⁴⁵ – 14¹⁵)

Беларуская мова ў прыродазнаўчых навуках

У мове нашай цэлы свет…

Адбудзецца сустрэча з вядучымі беларускамоўнымі даследчыкамі і выкладчыкамі ВНУ па праблемах ужывання беларускай мовы пры выкладанні вучэбных дысцыплін і стварэння вучэбных дапаможнікаў для студэнтаў спецыяльнасцей прыродазнаўчага профілю.

Запрошаны В.Я. Сідаровіч, доктар біялагічных навук, прафесар кафедры заалогіі Беларускага дзяржаўнага ўніверсітэта; Я.М. Сцепановіч, доктар біялагічных навук, прафесар кафедры агульнай біялогіі Беларускага дзяржаўнага педагагічнага ўніверсітэта; Ю.С. Гецэвіч, кандыдат тэхнічных навук, в.а. загадчыка лабараторыі распазнавання і сінтэзу маўлення Аб’яднанага інстытута праблем інфарматыкі Нацыянальнай акадэміі навук Беларусі.

Дзень 5. 27.02.2013 (серада, 12⁴⁵– 14¹⁵) Дзень беларускага перакладу

Пераклад у сістэме міжкультурных сувязей

Да ўдзелу запрошаны перакладчыкі філалагічнага факультэта Беларускага дзяржаўнага ўніверсітэта І.А. Чарота, доктар філалагічных навук, прафесар, загадчык кафедры славянскіх літаратур; В.П. Рагойша, доктар філалагічных навук, прафесар, загадчык кафедры тэорыі літаратуры; Т.В. Кабржыцкая, кандыдат філалагічных навук, дацэнт кафедры славянскіх літаратур.