BY З нагоды стагоддзя Беларускага дзяржаўнага ўніверсітэта прапануем вашай ўвазе новы раздзел нашага сайта, які дае магчымасць пазнаёміцца з плеядай навукоўцаў, што ў розны час працавалі на філалагічным факультэце.
У 2019 годзе наш факультэт адствяткаваў свой 80-гадовы юбілей. І хоць толькі 21 ліпеня 1939 г. было афіцыйна абвешчана пра стварэнне самастойнага філалагічнага факультэта, падрыхтоўка філолагаў ў Беларускім дзяржаўным універсітэце вялася з першых дзён яго заснавання. Спецыялістаў па мове і літаратуры рыхтавалі на этнолага-лінгвістычным аддзяленні факультэта грамадскіх навук, а пасля рэарганізацыі – педагагічнага факультэта.
Выпускнікі філалагічнага факультэта БДУ заўсёды займалі і займаюць сёння вядучыя пазіцыі ў грамадстве: большасць пісьменнікаў, заслужаных дзеячаў навукі, культуры, адукацыі – нашы выпускнікі. А як вядома, вялікую ролю ў поспехах сваіх вучняў адыгрывае Настаўнік.
