BY Працэс прафесійнага станаўлення студэнтаў – будучых выкладчыкаў беларускай мовы і літаратуры – немагчымы без педагагічнай практыкі. Падкрэсліваючы яе важнасць, намеснік дэкана па вучэбна-метадычнай рабоце, кандыдат філалагічных навук, дацэнт Мікалай Мікалаевіч Хмяльніцкі адзначыў, што атрыманне вопыту ў выглядзе практыкі – гэта важная частка адукацыйнага працэсу ў падрыхтоўцы будучага спецыяліста.
На выніковай канферэнцыі па педагагічнай практыцы студэнты 4 курса спецыяльнасці “Беларуская філалогія” ў форме “візітовак” прадставілі базы сваёй практыкі (СШ № 4 г. Мінска, гімназія з беларускай мовай навучання № 23 г. Мінска, гімназія-каледж пры Беларускай акадэміі музыкі і інш.), прадэманстравалі ў слайд-прэзентацыі памятныя моманты сваёй працы ва ўстановах адукацыі, выступілі з кароткімі паведамленнямі па актуальных праблемах методыкі выкладання.
З аналізам дзейнасці будучых выкладчыкаў беларускай мовы і літаратуры выступілі вопытныя кіраўнікі педагагічнай практыкі – прафесар кафедры рыторыкі і методыкі выкладання мовы і літаратуры Вольга Уладзіміраўна Праскаловіч, дацэнты кафедры рыторыкі і методыкі выкладання мовы і літаратуры (кіраўнік практыкі ад факультэта) Ірына Мікалаеўна Саматыя, кафедры гісторыі беларускай літаратуры Ганна Мікалаеўна Мятліцкая, кафедры педагогікі і праблем развіцця адукацыі Марына Уладзіміраўна Сідарава, кафедры агульнай і медыцынскай псіхалогіі Юлія Фёдараўна Лахвіч. У сваіх выступленнях выкладчыкі адзначылі, што студэнты падчас педагагічнай практыкі прадэманстравалі здольнасць выкарыстоўваць тэарэтычныя веды з розных прадметных блокаў (псіхолага-педагагічны, метадычны, культуразнаўчы) пры рашэнні пэўных адукацыйных задач.
Вынікі комплекснай работы падчас практыкі былі абагульнены і сістэматызаваны, прадстаўлены ў выглядзе прэзентацый, відэаролікаў, фотасправаздач.
Больш падрабязна тут
