BY 4 мая 2021 года на філалагічным факультэце адбыўся конкурс прамоўніцкага майстэрства сярод студэнтаў 3 курса спецыяльнасці “Беларуская філалогія”. Конкурс, правядзенне якога было прымеркавана да 100-годдзя БДУ, стаў адным са шматлікіх універсітэцкіх мерапрыемстваў, прысвечаных гэтай знамянальнай падзеі.
20 дзяўчат і юнакоў змагаліся ў рытарычным мастацтве, прысвяціўшы свае выступленні гісторыі нашай Аlma Mater (Вакуліч Алеся), актуальным праблемам і перспектывам развіцця Беларускага дзяржаўнага ўніверсітэта (Бірукова Анастасія), сэнсажыццёвым арыенцірам, каштоўнасцям студэнцкай моладзі (Басалыга Паліна, Карабан Данііл, Броўка Кацярына, Давыдзенка Яна, Лукашэвіч Вікторыя, Бойка Паліна, Дзяжынская Аліна, Даўгала Вікторыя, Казак Вераніка і інш.).
Паказальна, што самі назвы прамоўленых маналогаў нярэдка мелі экспрэсіўную, праблемную і вобразную форму: “Чаму вам трэба сінхранізавацца з Сонцам і Месяцам, калі вы не Пічэта?” (Пятрэнка Марыя) і інш.
У аснову прамоўніцкіх выказванняў быў пакладзены шматаспектны па сваім характары матэрыял – уражанні ад жыццёвых сустрэч з цікавымі людзьмі (выступленне Лісік Аляксандры), уласныя ацэначныя меркаванні (выступленні Юркойць Зміцера, Дамут Юліты, Герык Алісы, Анашка Дзіяны) і інш.
Некаторыя выступленні мелі асабліва арыгінальную форму. Так, Талалаева Дар’я прадставіла кранальны аповед пра свайго дзядулю, а маналог Карабана Данііла будаваўся на рытарычных пытаннях, што дазволіла слухачам уяўна стаць відавочцамі падзей.
Рэфрэнам выступлення студэнткі Біруковай Анастасіі сталі захопленыя і радасныя воклічы “За што мы можам падзякаваць БДУ!..”, “Каму з выкладчыкаў мы хочам сказаць дзякуй!..”, “Мы абавязаны памятаць!”, “Я дзякую!..”. Акрамя таго, аратар, звяртаючыся да аўдыторыі, прапанавала на лісце ватману кожнаму з прысутных аформіць свой адказ на пытанне “За што мы хочам сказаць БДУ дзякуй?”.
Выступленні суправаджаліся мультымедыйнай прэзентацыяй.
Па выніках конкурсу ганаровымі дыпломамі пераможцаў былі ўзнагароджаны: Бірукова Анастасія, Лісік Аляксандра, Талалаева Дар’я.
Лепшай у конкурсе прамоўніцкага майстэрства прызнана Пятрэнка Марыя, якая ярка выявіла свае рытарычныя здольнасці, арыгінальнасць выказвання, экспрэсію выканання.
Заахвочвальны прыз ад кафедры рыторыкі і методыкі выкладання мовы і літаратуры філалагічнага факультэта БДУ атрымала стараста студэнцкай групы Басалыга Паліна.
Падводзячы вынікі конкурсу, арганізатар мерапрыемства прафесар кафедры рыторыкі і методыкі выкладання мовы і літаратуры В. У. Праскаловіч падкрэсліла, што ва ўсіх выступленнях з нагоды ЮБІЛЕЮ БДУ гучыць тэма гонару за свой універсітэт. Расстаючыся з конкурсам, самі яго ўдзельнікі адзначалі, што гэта падзея падарыла ім яркія ўражанні і мора эмоцый.
Віват, УНІВЕРСІТЭТ!
Віват, БДУ!
