BY 
Іван Чыгрынаў (1934 – 1996) большасць сваіх мастацкіх твораў прысвяціў беларусам, якія на доўгіх чатыры гады Вялікай Айчыннай вайны патрапілі пад гітлераўскую акупацыю. Насельніцтва Беларусі чакаў сапраўдны генацыд – і героі чыгрынаўскіх апавяданняў, раманаў (у тым ліку самага славутага – “Плач перапёлкі”) супрацьстаяць тым выпрабаванням, пра якія нашчадкам трэба памятаць.
Гаворка пра гэта вялася 28 лютага 2025 г. на сустрэчы студэнтаў і магістрантаў-філолагаў з дачкой пісьменніка Аленай Чыгрынавай. Сустрэча праходзіла ў фармаце прэзентацыі 5-томнага Збору твораў Народнага пісьменніка Беларусі, які выйшаў у свет да 90-годдзя з дня яго нараджэння. Творчасць Івана Чыгрынава традыцыйна вывучаецца ў сістэме сярэдняй і вышэйшай адукацыі Рэспублікі Беларусь.
Алена Чыгрынава падзякавала дэкану факультэта Сяргею Важніку за набыццё для студэнтаў-філолагаў гэтага пяцітомніка, у які ўпершыню ўвайшла ўся драматургія і публіцыстыка пісьменніка. Кнігі паступілі ў бібліятэку БДУ. З дапамогай Крысціны Палянскай (загадчыка аддзела абслугоўвання бібліятэкі філалагічнага і эканамічнага факультэтаў) і Веранікі Наркевіч (бібліятэкара названага аддзела) усе прысутныя на прэзентацыі мелі магчымасць убачыць выставу кніг па тэме сустрэчы і пагартаць новыя тамы.
Алена Чыгрынава падзялілася ўспамінамі пра свайго бацьку, жыццё сям’і, унёсак блізкіх у выданне твораў пісьменніка. У сустрэчы ўдзельнічалі выкладчыкі факультэта: загадчык кафедры тэарэтычнага і беларускага літаратуразнаўства дацэнт Таццяна Марозава, супрацоўнікі гэтай кафедры – прафесары Людміла Сінькова, Алесь Бельскі, дацэнт Лада Алейнік, аспірант Кацярына Крыцук-Тарасава; дацэнт кафедры беларускага мовазнаўства Святлана Якуба, спецыяліст кафедры тэарэтычнага і славянскага мовазнаўства Наталля Еўчык.
