BY 
31 сакавіка 2026 г. дацэнт кафедры тэарэтычнага і беларускага літаратуразнаўства Ірына Шматкова і дацэнт кафедры беларускага мовазнаўства Марына Свістунова прынялі ўдзел у прэзентацыйным мерапрыемстве «Вясновыя перазовы: Жанчыны-творцы на старонках сакавіцкага нумара “Роднага слова”», якое ладзілася ў межах музейнага праекта “Літаратурная брама XXI стагоддзя” ў Дзяржаўным музеі гісторыі беларускай літаратуры. Штомесячны навуковы і метадычны часопіс “Роднае слова” і філалагічны факультэт БДУ звязвае цеснае і плённае супрацоўніцтва.
Удзельнікамі “Вясновых перазоваў” сталі аўтары сакавіцкага нумара – даследчыкі Мікола Трус, Міхал Бараноўскі, Ірына Шматкова, Алесь Бараноўскі, Алена Марозава і інш.
Падчас імпрэзы былі прадстаўлены праекты часопіса “Роднае слова”, многія з якіх ажыццяўляюцца ў кантэксце галоўнай тэмы 2026-га, абвешчанага Годам беларускай жанчыны.
Дацэнт Ірына Шматкова прадставіла свой артыкул “Транслінгвізм паэзіі Людкі Сільновай”, сумеснае выступленне літаратуразнаўцы і паэтэсы стала прэзентацыяй рубрыкі “Мастацкі свет творцы: даследчык і яго гераіня”.
Мерапрыемства прайшло ў атмасферы суладнасці музаў: свае вершы чыталі паэтэсы Ірына Багдановіч і Людка Сільнова, гучала вясновая музыка ў выкананні ансамбля флейтыстаў “Флюід” пад кіраўніцтвам Аляксандры Рэнанскай, дэманстраваліся мастацкія творы з часопісных публікацый, а таксама літаратурна-мастацкая экспазіцыя “Мелодыя жаночай душы” з калекцый Дзяржаўнага музея гісторыі беларускай літаратуры.
