Сэрвісы

Круглы стол «Каму і навошта патрэбна філалагічная фалькларыстыка? (станаўленне фалькларыстычнай школы БДУ)», прысвечаны 100-годдзю БДУ

15 кастрычніка 2021 года на філалагічным факультэце Беларускага дзяржаўнага ўніверсітэта адбылося пасяджэнне круглага стала «Каму і навошта патрэбна філалагічная фалькларыстыка? (станаўленне фалькларыстычнай школы БДУ)», прысвечанага 100-годдзю БДУ.

Арганізатарамі выступілі кафедра тэарэтычнага і славянскага літаратуразнаўства і вучэбна-навуковая лабараторыя беларускага фальклору. Прайшло мерапрыемства на базе залы інфармацыйных рэсурсаў аддзела абслугоўвання філалагічнага і эканамічнага факультэтаў БДУ.

У працы кругалага стала ўзялі ўдзел выкладчыкі і студэнты філалагічнага факультэта БДУ, замежныя магістранты спецыяльнасці «Літаратуразнаўства», аспіранты Цэнтра даследаванняў беларускай культуры, мовы і літаратуры НАН Беларусі.

Пачалося мерапрыемства са знаёмства з кніжнай выставай «Фалькларыстычная школа БДУ», падрыхтаванай супрацоўнікамі залы інфармацыйных рэсурсаў аддзела абслугоўвання філалагічнага і эканамічнага факультэтаў БДУ. Прадставіла кніжныя выданні загадчык аддзела Жанна Сцяпанаўна Карповіч. Яна адзначыла, што сваё фарміраванне фалькларыстычная школа БДУ пачала з 50-х гадоў мінулага стагоддзя з дзейнасці выдатных выкладчыкаў Льва Рыгоравіча Барага, Івана Васільевіча Гутарава, Ніла Сымонавіча Гілевіча, Веры Анісімаўны Захаравай, пазней – Васіля Дзмітрыевіча Ліцьвінкі, якія распачалі збор і выданне фальклорных матэрыялаў, заклалі асновы вялікага архіва. Далейшае сваё развіццё школа атрымала з адкрыццём на філалагічным факультэце кафедры тэорыі літаратуры пад кіраўніцтвам прафесара Вячаслава Пятровіча Рагойшы, які аб’яднаў пад сваім крылом усіх фалькларыстаў-філолагаў факультэта. Ідэйным натхняльнікам развіцця фалькларыстычнай працы на кафедры стала вучаніца Веры Анісімаўны Захаравай дацэнт Рыма Мадэстаўна Кавалёва, пад кіраўніцтвам якой з 1994 года і па сённяшні дзень ладзіліся ўсе мерапрыемствы, рапрацоўваліся навуковыя праекты, выдаваліся дапаможнікі і навуковыя зборнікі, былі абаронены кандыдацкія дасертацыі (В. В. Прыемка, Т. А. Марозавай, Т. В. Лук’янавай, С. В. Шамякінай). Дзякуючы сумеснай працы Настаўніка і яе вучаніц, традыцыі фалькларыстычнай школы, закладзеныя пачынальнікамі, працягнуліся, з’явіліся новыя напрамкі навуковай, вучэбна-метадычнай і выхаваўчай дзейнасці.

З праблемным дакладам «Каму і навошта патрэбна філалагічная фалькларыстыка?» выступіла кандыдат філалагічных навук, дацэнт Рыма Мадэстаўна Кавалёва. Яна адзначыла велізарны ўнёсак філолагаў-фалькларыстаў у справу захавання і даследавання фальклору, а таксама падняла важныя пытанні тэрміналогіі. У прыватнасці, закранула праблему падмены паняццяў «фальклор» і «нематэрыяльная культура».

Пасля асноўнага даклада адбылася дыскусія. Для абмеркавання былі прапанаваны наступныя праблемныя пытанні:

  1. Суадносіны паняццяў «фальклор», «вусная народная творчасць», «нематэрыяльная культурная спадчына».
  2. Ці магчымы міждысцыплінарныя даследаванні без філалагічнай фалькларыстыкі?
  3. Ці дастаткова прадстаўлена філалагічная фалькларыстыка на старонках сучасных кніжных выданняў?
  4. Філалагічная фалькларыстыка ў адукацыйным працэсе ВНУ.

Вынікам круглага стала стала асэнсаванне традыцый і новых тэндэнцый у галіне фалькларыстыкі, абмеркаванне актуальных праблем сучаснай філалагічнай фалькларыстыкі, абмен навуковым вопытам.

20211015 143009

 20211015 143551

20211015 143834

20211015 143936

20211015 143952

20211015 144009

 

 

Image

Рэсурсы

Image
Image