Сэрвісы

75-ГОДДЗЮ ПЕРАМОГІ ПРЫСВЯЧАЕЦЦА…

12 снежня 2019 года на філалагічным факультэце адбыўся конкурс прамоўніцкага майстэрства сярод студэнтаў 1 курса спецыяльнасці “Усходняя філалогія”. Конкурс, правядзенне якога было прымеркавана да 75-годдзя Перамогі ў Вялікай Айчыннай вайне, стаў першым у шэрагу шматлікіх універсітэцкіх мерапрыемстваў, прысвечаных гэтай знамянальнай падзеі.

З прывітальным словам да ўдзельнікаў конкурсу звярнуўся старшыня журы – намеснік дэкана, загадчык кафедры кітайскай філалогіі, дацэнт М.М. Хмяльніцкі. Адзначыўшы высокую грамадзянскую і творчую накіраванасць арганізаванага мерапрыемства, ён звярнуў увагу на тое, што ўрокі вайны дапамагаюць развіццю гістарычнага мыслення сучасніка. Гістарычнае мысленне – найважнейшая рыса духоўнага і маральнага свету народаў. Яно дапамагае выразней бачыць мінулае, глыбей разумець сучаснасць, дакладней вызначаць каардынаты будучыні.

35 дзяўчат і юнакоў змагаліся ў рытарычным мастацтве, прысвяціўшы свае выступленні маральна-патрыятычным тэмам: “Шчасце жыць у мірнай краіне” (Дар’я Шафар), “Чаму вайна не з’яўляецца рашэннем?” (Кацярына Вяркеева), “Як вайна паўплывала на людзей?” (Ульяна Масцікава), “Маё стаўленне да вайны” (Ганна Старавойтава) і інш. Апроч грамадзянска-патрыятычнай тэматыкі, выступленні аратараў на беларускай, рускай і туркменскай мовах прысвячаліся агульначалавечым маральным каштоўнасцям. Паказальна, што самі назвы прамоўленых маналогаў нярэдка мелі экспрэсіўную, праблемную і вобразную форму: “Разбіты крышталь сэрцаў” (Паліна Багамаз), “Чалавечнасць, не апаленая вайной” (Ганна Казлоўская), “Ніхто не забыты, нішто не забыта” (Ганна Машчыцкая), “Вайна вачыма дзяцей” (Ганна Шырокая) і інш.

У аснову прамоўніцкіх выказванняў быў пакладзены шматаспектны па сваім характары матэрыял – уражанні ад жыццёвых сустрэч з ветэранамі Вялікай Айчыннай вайны (выступленне Дзіяны Белай), успаміны родных –відавочцаў і ўдзельнікаў гэтых падзей (выступленні Анастасіі Кавалёвай і Ксеніі Смаляк), уласныя ацэначныя меркаванні (выступленні Івана Пугачова, Данііла Сіканава, Іллі Скакуна, Веранікі Хаванскай, Кацярыны Мароз, Ксеніі Далінчук) і інш.

Выступленні Лізаветы Лук’яненка, Ніколь Целагуз, Марыі Баранавай суправаджаліся мультымедыйнай прэзентацыяй (гл. па спасылцы прэзентацыя 1 і прэзентацыя 2) і прысвячаліся ролі мастацтва ваенных гадоў не толькі ў перыяд Вялікай Айчыннай вайны, але і ў сучасным жыцці.

Некаторыя выступленні мелі асабліва арыгінальную форму. Так, Герман Раманаў прадставіў кранальны аповед пра жанчын на вайне, а Кацярына Сашко распавяла пра гераічны шлях Аляксея Марэсьева; маналог Анжалікі Шапура будаваўся на рытарычных пытаннях, што дазволіла слухачам уяўна стаць відавочцамі падзей. Рэфрэнам выступлення студэнткі Яніны Картавіцкай сталі настойлівыя і трывожныя воклічы Мы памятаем!.. Мы хочам, каб памяталі!.. Мы абавязаны памятаць! Я памятаю! Акрамя таго, аратар, звяртаючыся да аўдыторыі, прапанаваў на лісце ватмана кожнаму з прысутных аформіць свой адказ на пытанне: Чаму мы павінны памятаць урокі вайны? (гл. фота). Пазнаёмімся з адным з запісаў, у якім цытаваліся радкі з верша Р. Раждзественскага “Рэквіем”: «Помните! Через века, через года, — помните! О тех, кто уже не придет никогда, — помните!»

Па выніках конкурсу ганаровымі дыпломамі пераможцаў былі ўзнагароджаны: Віктар Васенін (за выступленне на тэму “Палітыка генацыду на тэрыторыі БССР”), Паліна Дубовік (выступленне “Адлюстраванне вайны ў творах беларускай літаратуры”), Яна Валюк (за выступленне “Здань пяра” – прамова пра значэнне франтавых лістоў), Яніна Картавіцкая (за выступленне “Я памятаю”), Ангеліна Талачко (за выступленне “Вайна праз пакаленні”).

Лепшай у конкурсе прамоўніцкага майстэрства прызнана Лізавета Кошман, ярка выявіўшы свае рытарычныя здольнасці, арыгінальнасць выказвання, экспрэсію выканання.

Прызам глядацкіх сімпатый была адзначана Анастасія Січкар.

У спецыяльнай намінацыі конкурсу – “За прыхільнасць нацыянальным традыцыям” – адзначана студэнтка з Туркменістана Лейлі Базарава (за выступленне на тэму “Бессмяротны подзвіг савецкага народа ў Вялікай Айчыннай вайне”). Яркае, эмацыянальна выкананае выступленне студэнткі суправаджалася чытаннем на памяць вершаў на туркменскай мове. Але і без перакладу ўсім прысутным было зразумела, што туркменскі народ, як і ўвесь савецкі народ, рабіў усё, каб наблізіць гадзіну Перамогі.

Падводзячы вынікі конкурсу, арганізатар мерапрыемства прафесар кафедры рыторыкі і методыкі выкладання мовы і літаратуры, прафесар кафедры кітайскай філалогіі В.У. Праскаловіч падкрэсліла, што ва ўсіх выступленнях у гонар Дня Перамогі гучыць тэма вайны як часткі сямейнай гісторыі, жывая памяць, якая з’яўляецца найважнейшай каштоўнасцю цяпер жывучых.

Развітваючыся з конкурсам, самі яго ўдзельнікі адзначалі, што гэта падзея падаравала ім яскравыя ўражанні, і аднадушна выказваліся ў падтрымку ідэі штогадовага правядзення падобнага мерапрыемства да Дня Перамогі.

Image

Рэсурсы

Image
Image
Наш сайт использует файлы cookie

Наш сайт использует файлы cookie для сбора статистики. Нажав «Принять», вы даете согласие на обработку файлов cookie в соответствии с Политикой обработки файлов cookie.