BY 12 мая 2022 года на філалагічным факультэце БДУ былі падведзеныя вынікі конкурсу перакладчыкаў «Улюбёныя ў слова», які арганізавала кафедра тэарэтычнага і славянскага літаратуразнаўства ў гонар 80-годдзя з дня нараджэння і 55-годдзя навукова-педагагічнай дзейнасці прафесара Вячаслава Рагойшы.
У конкурсе прынялі ўдзел студэнты розных курсаў спецыяльнасцей «Беларуская філалогія», «Славянская філалогія» філалагічнага факультэта, а таксама спецыяльнасці «Сучасныя замежныя мовы (пераклад)» факультэта сацыякультурных камунікацый БДУ.
На конкурс былі прадстаўленыя 23 работы – пераклады на беларускую мову вершаў Аляксандра Пушкіна «Анчар», Тараса Шаўчэнкі «Реве та стогне Дніпр широкий», Адама Міцкевіча «Burza».
У склад журы конкурсу ўвайшлі дактары філалагічных навук, прафесары Вячаслаў Рагойша і Таццяна Шамякіна, кандыдаты філалагічных навук, дацэнты Мікалай Хмяльніцкі і Элла Дзюкава, старшы выкладчык Марына Фамянкова.
Пераможцамі конкурсу сталі тры чалавекі. Студэнтка 2 курса спецыяльнасці «Славянская філалогія» Аліна Некрэвічус атрымала дыплом другой ступені за пераклад верша Адама Міцкевіча. Студэнткі 2 курса Юлія Гурыновіч і 1 курса Марыя Шкляр спецыяльнасці «Беларуская філалогія» атрымалі дыпломы трэцяй ступені за пераклад верша Аляксандра Пушкіна і Тараса Шаўчэнкі адпаведна. Асобную ўзнагароду за творчае пераасэнсаванне і ўзнаўленне верша Тараса Шаўчэнкі ў песеннай форме атрымала студэнтка 4 курса спецыяльнасці «Сучасныя замежныя мовы (пераклад)» Вера Маліноўская. Першае месца ў конкурсе засталося незанятым.
Ва ўрачыстай абстаноўцы доктар філалагічных навук, прафесар Вячаслаў Рагойша павіншаваў удзельнікаў і ўзнагародзіў пераможцаў конкурсу. Усе студэнты атрымалі ганаровыя граматы, а пераможцы – памятныя падарункі – кнігі Вячаслава Рагойшы з аўтографам аўтара.
